مقاس 0 .. يعني إيه وإيه حكايته؟

أكيد في مرة نزلتي تجيبي لبس و عجبتك حاجة أوي بس مالقتيش مقاسك منها أو لقيتي في انكماش غير عادي في المقاسات، طب عمرك حاولتي تعرفي ده حاصل ازاي و ليه؟ أكيد شوفتي على الفيسبوك بوست عن ازاي مارلين مونرو جسمها مش مثالي بس بتعتبر أيقونة جمال، ده حصل ازاي برضو؟ الحكاية كلها في مقاس 0.

مقاس 0 ده تاني أصغر مقاس في المقاسات الأمريكية و بيعادل مقاس  XXS أو 30 في المقاسات اللي معظمنا بنستخدمها. لحد التسعينات، مكانش مقاس 0 منتشر بعدين جات كيت موس لعالم الموضة وقلبت كل حاجة. النقطة الحقيقية لانطلاق كيت كان ظهورها في حملة دعائية لـ  “Calvin Klein”في 1996، كان سبب اهتمام الناس بيها إنها مكانتش شبه العارضات التانية في الوقت ده زي سيندي كرافورد وكان الجسم المثالي له شكل تاني تماما. كيت موس دلوقتي من أشهر الـ supermodels ومشوارها المهني بدأ في 1988 و لسة مكمل لحد دلوقتي.

إزاي مارلين مونرو أيقونة جمال مع إنها جسمها مش “مثالي” بمعايير دلوقتي؟ في الوقت اللي مارلين كانت عايشة فيه مقومات الجمال كانت مختلفة، مارلين نفسها مكانتش عندها كل المقومات دي وعملت عمليات تجميل. بعد شهرة مارلين بقيت هى من الناس اللي بتحدد مقومات الجمال دي وده بيبان أكتر لما نقارن مارلين بأي ممثلة من وقتها ونشوف إنهم كان لهم شكل معين مختلف عن ممثلين و عارضات ازيادلوقتي.

مع إن مقاس 0 في وقتنا الحالي بيعادل مقاس 2 في 2001 وأكبر من مقاس 6 في 1970 و مقاس 8 في 1958 بس لسة في بنات كتير بتحرم نفسها من الأكل عشان توصل للـ”جسم المثالي” سواء بيشتغلوا في الموضة أو لا، الموضوع ساعات بيوصل للموت.  موت عارضة الازياء لوسيل راموس في عرض ازياء في 2006هو تقريبا أشهر موت فيهم و السبب في تغيير القاسات بين سنة 2001 و 2011.

لازم تتعلمي تحبي نفسك وشكلك وماتمشيش ورا “الجسم المثالي” على حساب صحتك عشان الجسم اللي انت فاكراه مثالي دا ممكن يتغير قي أي يوم بس صحتك عمرك ما هتعرفي ترجعيها، ولازم تعرفي إن كل واحدة فينا حلوة بطريقتها و مش محتاجة تبقى شبه الممثلات و عارضات الازياء.

إقرأ أيضا

ظاهرة هياتم .. “قبضاي” الوسط الفني الذي حيّر الصحافة