نسر السين .. مسلسل بارودي أصيل

حسام الدين

مُسلسل البارودي ” نسر السين ” مسلسل بيسخر من عالم الراب ع اليوتيوب و واخد نفس قالب الموكيودراما بتاع مسلسل أوفيس مع تشابهات كتير زي إن المُسلسلين عن شخوص هزلية كاريكاتورية تُبالغ في تصوراتها عن نفسها و كل شخص يبوح للكاميرا بفكرته عن العالم بإعتباره هو مركز العالم و الكوميديا بتيجي من إنك تُحط الأفكار دي جنب بعض . فتكتشف قد إيه الأفراد هم أسرى سرديتهم وفكرتهم عن العالم لا العالم نفسه .

الجميل إنهم توسلوا لخلق كوميديا البارودي

عالم الراب وهو عالم قائم على خلق هوية مٌبالغة للفرد عن نفسه زي “ النسر ” و خلق حالة إستعداء للجميع و خلق معركة وهمية تخلق الذات مشهديتها بإنتصارها فيها ، عالم مُناسب جدًا للبارودي لإن قوامه أهم فكرة للبارودي و هي المفارقة بين الواقع و ” المُبالغة “.. الحقيقة و ” الإنكار “

الراب المصري هو أقرب لمُفاخرة قبلية من شاعر بيُضخم ذاته بشكل نرجسي كآلية دفاعية تجاه عالم يكاد يبتلعه ، عالم لا يفهمه و لا يُريد اللعب بقوانينه فيخلق قوانين جديدة و قيم جديدة و كلمات جديدة و عدو حاضر غير تهويمي يُمكن هجاؤه و الإنتصار عليه بطوفان كلمات ، يعني في جزء منه هو دفاع نرجسي ضد عالم لا يفهمه الرابر و يرفضه

المُفارقة إن عُمدة و ” نسر السين ” بيتناول المُفارقة بين الفكرة دي و فكرة إن الرابر في مسعاه دا يكاد يتوسل لنيل الإعتراف من ذلك العالم اللي راسماله هو رفضه و سلعته هو هجاؤه لكن رغبته الأساسية هي أن يتم قبوله وينال الفيوز من العالم اللي بيرفضه دا ، عشان كدا مُنتمين كتير للراب سين بيعتبروا شعبية ويجز و غيره هي دليل إنه خضع لمقاييس العالم اللي راسماله هو هجاؤه و رفضه و صار تُجاري و دا تعميد طرده من السين

الميزة الأساسية لنسر السين هي إنه بيقدم للكوميديا المصرية ما يُقدمه الراب للمشهد الموسيقي ، الراب موسيقى جاية من عالم سُفلي أعنف و أكتر فجاجة و حقيقة و غضب و صدق من أبنية الأغنية الفوقية ، و كوميديا نسر السين هي كوميديا جاية من عالم سفلي ، تتوسل فضاء اليوتيوب العام و مُعدات بسيطة و كتابة جميلة و فجاجة و عنف لفظي شبيه بواقع الأفراد أكتر طزاجة بكتير من أبنية كوميديا الفارص و تياترو مصر و كوميديا التقليد اللي إرتدينا ليها بقالنا سنين

كأي بارودي لابد أن يكون أكثر خفة بكثير من أن يحمل جدية كلنا عارفين إن عمدة رابر سييء ولا يملك موهبة و إنه لا يقدم بالفعل كلام الشارع و إنه منفصل عن الشارع أصلًا حتى إنه يحاول وصاله بشرايط كاسيت إنقرضت و براب عن الحلم العربي بيُحاكي أوبريت ينتمي لأربع أو خمس أجيال قبل عمدة لكن كور أو قلب مسلسل نسر السين هو قلب مسلسل ذا أوفيس؟

رغبة شخص ما أن يكون محبوبًا بشدة ، مايكل سكوت بيمارس دا بسلطته الإدارية كمدير جمهوره موظفين عالقين معه ، و عُمدة بيمارس دا بسلطته المعنوية على شلة نكرات لا قيمة لهم خارج كونهم جزء من كيان ما هو عيلة النسور

من أجمل الشخصيات هو ” هوبز ” و هو شبيه ” توبي فليندرسون ” في ذا أوفيس و هو الشخص المنطقي العقلاني اللي بيحاول التعاطي بجدية في وسط ومساحة عاطفية قايمة على الإنكار فتتم شيطنته و يبدو كالمجنون لإنه يحاول التعاطي بمنطق مع عالم هارب من المنطق و دا بيخلق كوميديا جميلة في صدام الشخص دا مع لُغة و فقاعة الإنكار اللي عايشها جميع أفراد السين