٧ نصائح سريعة للسائقين المحترفين “إزاي نعرف البنزين مخلوط ولا لأ؟”

إذا كنت تمتلك سيارة فأنت من الأشخاص المحظوظين داخل مصر وفي نفس الوقت من “المقرور” عليهم، وبما إننا في وقت، الغلاء يضرب كل حاجة في البلد خصوصًا أي حاجة بتتحرك واللي عنده عربية مابيفكرش يبيعها عشان مش هيقدر يشتري بتمنها جديد، هنقدم لك سبع نصائح سريعة من بعض السواقين الخبرة و المحترفين للحفاظ على سيارتك أو التعامل مع المشكلات اللي ممكن تجبرك على تغيير العربية.

1- لو قررت تركن عربيتك لمدة قصيرة هتشتري فيها حاجه وكان الجو حر لف الدريكسيون 180 درجة؛ عشان تتجبت سخونة الدريسكيون لما ترجع.

2- كلنا بنعاني من المنتجات المضروبة وعشان تعرف الزيت اللي بتستعمله كويس ولا مضروب، سخن عربيتك عشر دقايق واسحب عينة من الزيت وحطه على ورقه بيضا وسيبها في مكان دافي، لو البقعة حوافها ناعمة يبقى الزيت اللي بتستعمله كويس، لو في بقعه تانية ظهرت في نص البقعة يبقى الزيت لازم يتغير فورًا، ولو في بعض المكونات الصلبة في الزيت معنى ذلك إن الموتور فيه مشكلة ولازم تغير الزيت فورًا.

3- عشان تعرف البنزين كويس ولا مخلوط هات ورقة بيضا وحط عليها شوية بنزين وسيب البنزين يتبخر، لو فضل بقعة على الورق يبقى البنزين ده مخلوط بجاز يا معلم وكدا في خطر على موتور العربية.

4- لو بتشتكي من ريحة غريبة أو وحشة داخل العربية ومش فاضي لا تنضف ولا تغسل، افتح الباب اللي قدام وتعالا على الباب اللي قصاده وافتحه واقفله هيطردلك الريحة ولو مؤقتًا وممكن المدام تتولى المهمة دي، خصوصًا أنهم بيرزعوا الباب بالتخصص.

5- لو عندك مشكلة دايمًا في الركن بالجراج.. حلها بسيط علق حبل في السقف ونزل منه كورة تنس أو كورة بنج مثلا عند المسافة اللي حابب تركن فيها؛ عشان ماتلبسشي في الحيط يا معلم.

6- لو بتحب تشرب قهوتك وأنت سايق وعندك مشكلة في تنظيف المكان اللي بتحط فيه المج، بسيطة هات ورقة من اللي بنستعملها في عمل الكب كيك وحطها كتخشينة للحامل بتاع المج، وساعتها كل الفضلات هتنزل في الورقة دي وتقدر تشيلها بكل سهولة.

7- لو حصل خدش بسيط في عربيتك مش محتاج تروح لحد يمحي لك الخدش، هات ورنيش بنفس لون عربيتك من أي محل دهانات وبفرشة مانيكير ممكن تخفي الخدش بسهولة.