ترجمة بيان حزب الله 02

يلا بينا نكمل مشوار ترجمة بيان حزب الله في نعي حسن نصر الله من “اللغة الشيعية”، أو بمعنى أكتر دقة.. تفسير وشرح للمصطلحات الدينية الشيعية الموجودة في البيان، واللي بدءناها هنا بمصطلحين “سماحة” و”العبد الصالح”. بس فات عليا مصطلح “السيد”.. فخليني أبدء بيه سريعًا.

سيد يا سيد

لقب السيد في حالة حسن نصر الله مش مجرد لقب لمن لا لقب له، زي السيد أحمد عبد الجواد ولا السيد رمضان أبو سُرة، لع.. السيد هنا ليها دلالة تانية خالص.

ونقدر نفهم الفرق عن طريق الترجمة للعامية، “السيد” لما نكلمه بالمصري ماينفعش نقولُّه “فوت علينا بُكرة يا سيد” إنما نِمَلِّس عليه ونقولُّه “بركاتك يا سيدنا”.

أيون.. “السيد” هنا بمعنى “سيدنا”. هتسألني ليه “سيدنا”؟.. أقولك أنا ليه.

فيه حديث منسوب للنبي بيقول: “الحسَنُ والحُسَيْنُ سيِّدا شبابِ أهلِ الجنَّةِ إلَّا ابنَيِ الخالةِ: عيسى ابنَ مَريمَ ويحيى بنَ زكريَّا، وفاطمةُ سيدةُ نساءِ أهلِ الجنَّةِ؛ إلا ما كان من مريمَ بنتِ عِمرانَ” (الراوي: أبو سعيد الخدري – المصدر: صحيح الجامع – حكم المحدث: صحيح).

فالشيعة ومعاهم المتصوفة، وكل المنطلقين من أرضية تقديس آل البيت، بيقولوا بما إن أحفاد النبي سادة على أهل الجنة.. يبقى نسل أحفاد النبي سادة على أهل الأرض.

هنا مثلا في مصر هنلاقي ألقاب زي سادة وأشراف بتتقال فيما يخص القبايل اللي منسبين نفسهم لآل بيت النبي، زي نقابة الأشراف كده، إنما بلد زي إيران فلقب سيد ده بينكتب في البطاقة، فيبقى المواطن من دول اسبيشيال عن باقي المواطنين، كده بمجرد الميلاد لإنه يحمل الدماء الشريفة المقدسة.

تحت العمة سيد

تقول القاعدة الجهوية إن كل سيد هو شريف بس مش كل شريف يبقى سيد، يعني إيه الكلام ده؟

تقول الأسطورة أن كل المنتسبين لسلالة آل بيت النبي “أشراف”، يحملون الدماء الشريفة، بس بعض الأشراف بيكونوا سادة وبعضهم بيكونوا أشراف بس، وده مش عن طريق تحقيق أو التميز في أي شيء.. مجرد أن يكون مكتب التنسيب قال إنك من سلالة الحسين أو فاطمة الزهراء.

الفرد من الجماعة الأسياد “رعنا يجعل كلامنا خفيف عليهم” ينفع يدرس الفقه والشريعة ومختلف مواد الدين الكتيرة، فإذا فلح واتخرج من المدرسة “الحوزة” وبقى شيخ بيستلم العِمة، وعمة الـ”سيد” بتكون سودة، ومافيش أي حد تاني يقدر يلبس اللون ده حتى لو درجته العلمية أعلى، والعمة عند رجال الدين زي الأزبلايط عند العساكر، هي اللي بتحدد رتبهم، وده لازم يتوضح في كل مخاطبة رسمية حتى لو كانت نعي.

قافلة شهداء كربلاء

المصطلح ده بيرمز بالشيعي للقافلة اللي خرجت من مكة في طريقها للكوفة بقيادة الحسين بن علي، حفيد النبي، قافلة أغلبها من آل بيت النبي وكان مصيرهم الدبح على أيد جيش الأمويين، وكانت قيادتهم السياسية وقتها في أيد اليزيد بن معاوية بن أبي سفيان، وهي الواقعة من أهم أحداث تاريخ الإسلام ولسه المسلمين راكنيين عندها لحد النهارده، وأدت بشكل رئيسي لانقسام الدين الواحد لمذهبين كبار كل واحد فيهم بيشكك في صحة عقيدة التاني.

المهم.. بما إن المرحوم “سيد” وكمان مات خلال حرب هدفها إقامة الخلافة الشيعية، فهو كده مش بس شهيد.. إنما بينضم ضمنيا لقافلة شهداء كربلاء.

المسيرة الإلهية

مصطلح “المسيرة الإلهية الإيمانية” هو مصطلح شيعي بامتياز، وظهر أو تم نحته انطلاقا من تأويل فقهاء ورجال الدين الشيعة للآيتين رقم 285 و286 من سورة البقرة ﴿آمَنَ الرَّسُولُ بِمَا أُنزِلَ إِلَيْهِ مِن رَّبِّهِ وَالْمُؤْمِنُونَ ۚ كُلٌّ آمَنَ بِاللَّهِ وَمَلَائِكَتِهِ وَكُتُبِهِ وَرُسُلِهِ لَا نُفَرِّقُ بَيْنَ أَحَدٍ مِّن رُّسُلِهِ ۚ وَقَالُوا سَمِعْنَا وَأَطَعْنَا ۖ غُفْرَانَكَ رَبَّنَا وَإِلَيْكَ الْمَصِيرُ *  لَا يُكَلِّفُ اللَّهُ نَفْسًا إِلَّا وُسْعَهَا ۚ لَهَا مَا كَسَبَتْ وَعَلَيْهَا مَا اكْتَسَبَتْ ۗ رَبَّنَا لَا تُؤَاخِذْنَا إِن نَّسِينَا أَوْ أَخْطَأْنَا ۚ رَبَّنَا وَلَا تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِن قَبْلِنَا ۚ رَبَّنَا وَلَا تُحَمِّلْنَا مَا لَا طَاقَةَ لَنَا بِهِ ۖ وَاعْفُ عَنَّا وَاغْفِرْ لَنَا وَارْحَمْنَا ۚ أَنتَ مَوْلَانَا فَانصُرْنَا عَلَى الْقَوْمِ الْكَافِرِينَ﴾.

وهي في نظرهم تحدد خط سير المؤمنيين من الإيمان بأن النبي صادق وفعلا يوحى إليه ثم الإيمان بكلام الوحي عن وجود الله ووحدانيته وأحقيته بالعبادة والخضوع ثم الإيمان بالملائكة وما سبق من كتب ورسل.. ثم الإقرار بالسمع والطاعة، وخيرا طلب الرحمة والعفو.. قبل ما يروحوا يحاربوا الكافرين.

الحاج صاحب الوقت

هنا عندنا مصطلحين، أو بالأدق مصطلح ورمز (صاحب العصر والزمان “ع.ج”)، فيطلعوا إيه دول؟؟

صاحب العصر والزمان أو صاحب الزمان أو صاحب الوقت كلها صيغ متنوعة لنفس المُشار إليه وبناء عن نفس الفكرة، وهو المهدي المنتظر. والمهدي المنتظر عند الشيعة الأثنى عشرية مش شخصية مجهولة منتظر ميلادها.. لأ، ده موجود أصلا وأتولد من زمان جدا.. هو بس مختفي شوية.

هو محمد المهدي ابن الحسن العسكري؛ وبيوصل نسبه للإمام علي من ناحية ابنه الحسين وحفيده زين العابدين، هتلاقوا القصة بالتفصيل هنا، من الاختلاف حوالين ميلاده من عدمه لغاية اختفاءه في سرداب سري وهو طفل لحد دلوقتي، فيما يعرف حداهم بالغيبة الكبرى.

أما بقى (ع.ج) فده اختصار لجملة (عجل الله فرجه)، زي كده (“ص” أو “صلعم”) بعد اسم النبي اختصارا لـ(صلى الله عليه وسلم).

ولي أمر المسلمين

مين بقى ولي أمر المسلمين وإيه صلاحيات صاحب اللقب ده؟ وإيه مده أهميته؟

لو رجعنا لمقال حزب الله مقاومة لبنانية ولا احتلال إيراني هنلاقي جملة مهمة جدًا قالها الراحل حسن نصر الله في تعريفه للمشروع السياسي لحزب الله. هنلاقيه بيقول إن الحاكم الفعلي للبلاد هو صاحب الزمان، يعني الإمام الغايب في السرداب من قرون.. وينوب عنه “الولي الفقيه”؛ وهو ده ولي أمر المسلمين في نظرهم.

صلاحيات الولي الفقيه ده بقى غير محدودة وقراراته غير قابلة للنقاش، ورغم إن نظرية “ولاية الفقيه” هي نظرية فقهية عليها خلاف بين فقهاء الشيعة.. لكن بقوة السلطة تم فرضها على المجتمع والدولة في إيران وكمان حمايتها دستوريًا، طبقًا للمادة الخامسة من الدستور حداهم.

إقرأ أيضا

حكاية كل أكلة … الأكلات المشهورة وسبب تسميتها

دام ظله

تعريف دام ظله سهلة نسبيا، فهي كده شبه.. يديله الصحة وطولة العمر، بس في نفس الوقت شايلة دلالة إن المسلمين العادة عايشين في ضِله، فبيدعوا بدوام ظله عشان همه يستظلوا بعلمه من الشبهات ووسوسات الشياطين زي الإنسان ما بيستظل بالشجرة من الشمس، فهمه في الواقع بيدعوا لنفسهم مش ليه.

المراجع العظام

المراجع جمع مرجع، وده لقب ديني بيحصل عليه عدد كبير من رجال الدين الشيعة، بناء عن جماهيريتهم، بس بيفضل فيه مرجع أعلى زي “علي السيستاني” كده.

وعن أهمية لقب المرجع الأعلى بيقول علي الوردي في الجزء التالت من كتابه “لمحات اجتماعية من تاريخ العراق الحديث: “إذا مات المرجع السابق حصل التنافس بين المجتهدين الذين يلونه في المنزلة، وهذا التنافس قد يقصر أو يطول حسب اختلاف الظروف، وكثيرًا ما ينحصر بين اثنين منهم، إذ يكون لدى كل واحد منهم عدد من المقلدين قريب مما لدى الآخر، وحينذاك تشتد المنافسة بينهما، وتتخذ أنماطًا وصورًا شتى، ولا يستطيع أحدهما أن يحصل على المرجعية العامة إلا بعد أن يموت منافسه“.

هنلاقي بسهولة على ويكيبيديا قايمة بالمرجعيات العظام المذكورين في النعي.

الخلاصة

نفهم من كل ما سبق إن كاتب النعي وصف نصر الله بسماحة السيد، يعني راجل الدين التقي المتواضع الخلوق مع كافة البشر.. رغم إنه سيدهم بالميلاد لكونه من نسل الحسين، ووصفه كمان إنه على اتصال بالله ويعلم ما لا يعلم باقي البشر.

ثم بشر بالتحاقه بزمرة الشهداء اللي قتلهم جيش الأمويين في كربلاء؛ لإنه مات وهو على نفس طريقهم.. طريق المسيرة الإلهية الإيمانية.. اللي بتبدأ بالإيمان بنبوة محمد وتتم بقتال غير المسلمين.

وأخيرًا قدم واجب العزا للقيادات الدولة والمجتمع حسب ترتيبها البروتوكولي، أولًا الطفل المختفي في السرداب من قرون.. ودعا بتعجيل ظهوره، ثم بعد منه “نائبه بالحق” علي خمائني؛ بوصفه ولي أمر المسلمين “يعني صاحب سلطة الولي الفقيه”.. وطبعًا دعا لنفسه وباقي المسلمين أن يديم عليهم ظله، ثم مختلف المراجع العظمى على مر الزمان، وفي الأخر ييجي بقى البشر العادة.

أتمنى أكون وفقت في الترجمة النعي وساعدت كل مهتم في فهم دلالات النعي، كمصدر مهم وكاشف للمرجعية الفكرية للكيان ده وبالتالي كل واحد يبقى عارف هو بيدعم مين وبيناصر أفكار شكلها إيه.