الثوابت الوهمية.. (الجزء التالت: تحريم الرق) 03 – جواري النبي

الحلقتين اللي فاتوا وضحنا أن مافيش نَص يُحرِم الرق بشكل قاطع، ورغم كده التحدي قائم لأخر حلقة، اللي يلاقي نص بالتحريم يتفضل يرد عليا إن في موقع تاني أو على صفحته أو في التعليقات.. أو حتى يبعتلي وأنا بنفسي هانشر كلامه هنا.

هو كويس.. اللي حواليه همه اللي وحشين

دي مدرسة في التفكير يتبناها عادة جمهور أي طاغية أو قائد فاشل، هي في الواقع حيلة نفسية أكتر منها طريقة تفكير.. الشخص من دول ومع سيل الحقايق اللي بينهال لتوضيح جنون ووحشية زعيمه المفضل، فبدل ما يواجه نفسه بالحقيقة ويقوم يشيل صورة السفاح الملطوعة ع الحيطة.. عقله بيلجأ للحيلة الدفاعية الساذجة دي، وفي لحظة بعد ما كان صدام (نموذجًا) عالم ببواطن الأمور وكاشف كل ألعايب والمؤامرات الكونية ع الأمة.. فجأة يبقى مش عارف عمايل أقرب قادة أجهزته ومستشاريه، اللي كلهم تنقية أيده وأغلبهم قرايبه أساسا.

 صدام حسين

قضية الرق في الإسلام بتشغل عند المسلمين العادة (راجع تعريف العوام والخواص) نفس آليات الدفاع النفسي، فبعد توضيح أن مافيش نص بالتحريم القطعي وتوضيح الفرق بين التحريم التدريجي والتحريم النوعي ونفتح كتاب التاريخ ونشاور للمؤمن على تاريخ الرق في الإسلام، هنا مابيفضلش قدامه غير مقولة: الإسلام حجة على المسلمين مش المسلمين حجة على الإسلام.

وهي مقولة سليمة نظريًا، بس ماينفعش تصدر من شخص بيدافع عن تاريخ الشخصيات دي نفسها دفاعه عن كتابه المقدس.

المسلم في خانة اليَّك

الطرح الديني الإسلامي بيزنق أتباعه ويحرمهم كل منفذ للتقدم.. ومن أي فرصة لأثبات صحة طرحهم بشكل منطقي.

الإسلام دين الله الحق الذي لا تشوبه شائبة (فماينفعش يكون فيه أي خطأ أو نقص)

هو الدين الخاتم والمتمم لكل الأديان (بالتالي مافيش فرصة لتطوير فكرة الدين بعده)

الشخوص اللي الدين وصل لنا عن طريق روايتهم لو غلطوا.. يبقوا مش معصومين.

بس لو انتقدهم نكتشف أن معمولهم فرع خصوصي في علوم الدين اسمه “علم الرجال”. مفاده أن الناس دي مش وارد يغلطوا في أمور تخص الدين.

الأزمة الأكبر بقى هي تقديس كل ما هو إسلامي.. حتى التاريخ، فنفس الشخص بتاع المسلمين مش حجة ع الإسلام هيستميت في الدفاع عن أي شخص من اللي عاشوا زمن النبي أو حتى أتولد بعد وفاته بقرون بس تصادف وأشتغل خليفة أو فقيه.

 كتاب علم الرجال

ثابت تاريخيًا أن دولة الخلافة من قيامها لنهايتها ماخليتش من الرقيق، من أول قن الأرض لغاية بلاط الخلفاء، بس المسلمين العادة بيكسلوا يقروا.. فبيتحقق شعار السلسلة: “يتفق عموم المسلمين ع التعصب للإسلام… والجهل به”.

من السهل أحيلكم على مقالي المثلية في بلاط الخلافة بما فيه من أدلة تاريخية مش بس على انتشار الرق في دولة الخلافة عبر عصورها.. إنما كمان لاستغلال الرقيق جنسيًا، ستات ورجالة.

بس برضك جرت العادة أن يرد على التاريخ ده بمقولة “العيب في التطبيق مش في النظرية”، أو حسب المقولة التراثية: “الإسلام حُجة على المسلمين.. والمسلمين ليسوا حُجة على الإسلام”.

فتعالوا الحلقة دي نشوف موقف النبي من الرق، بوصفه الوحيد الحُجة.. بصفته المصدر.

الرق في عصر النبوة

في سنن النسائي باب بعنوان “كتاب البيع”، جامع فيه أشكال وأساليب البيزنس الإسلامي، أحد النماذج المذكورة في الباب ده بعنوان بيع الحيوان بالحيوان يدًا بيد متفاضلًا بيذكر لنا رواية منسوبة للنبي مفادها أن شخص ما قابل النبي وبايعه وهو قبل منه البيعة وخلاص كده بقى مسلم، بس فجأة ظهر راجل تاني طالب النبي يرجع له الراجل الأولاني لإنه عبد عنده أصلًا، النبي أتفاجئ لأن رجل1 مكانش باين عليه العبودية (يبدو كان لابس كويس.. وطبعًا ماكنش إسود).

فحلًا للإشكال طلب النبي من رجل2 إنه يشتري منه العبد بتاعه (رجل1)، وفعلًا قدر يقنعه بالبيع بإنه أشتراه منه بعبدين سود، ومن يومها أتعلم أن أي حد مايعرفهوش ييجي يبايع بقى يسأله: أنت عبد يا أبني ولا حر؟

إقرأ أيضا

الحاج صاحب الوقت

 نص الحديث

حسب كتاب المستدرك على الصحيحين أمتلك النبي جواري، أشهرهم هدية المقوقس ماريا القبطية، كان معاها أختها “سيرين”.. هادى بيها حسان بن ثابت، وبالبحث نوصل لأسماء زي:

ريحانة بنت زيد النضرية (سباها يوم حرب بني قريظة).

نفيسة جارية زينب بنت جحش (أهدتها له بمناسبة إنه صالحها بعد شهر من الهجر).

نخلص من ما سبق أن النبي قايض عبيد ببعض وقبل جواري كهدية.. وهو هادى بجواري.. وغنمهم من الحرب، وبما أن الستات المذكورة مش مقاتلات يبقى سبي نساء الجيش المهزوم حلال شرعًا.

الحلقة الجاية هنمر بسرعة على أهم محطات دولة الخلافة، ونرصد مدى ألتزام خلفاء النبي بالسبي أو أمتلاك الرقيق، باعتبارها سُنة فعلية.. أو ع الأقل حلال شرعًا، إلا لو حد ناوي يحيرنا حيرة كتبغا في وا إسلاماه ويفاجئنا أن نبي الإسلام مش حُجة ع الإسلام.