517 مشاهدة
المشوار شيق ومتشعب .. وممتع
مشاهد جنينة الحيوانات بالليل في مسلسل المشوار جميلة وممتعة جدًا بصريًا، ماتقلش حلاوة عن مشاهد جراج ترام أسكندرية.
قرار دفن الكنز ذكي وهيخلق مستقبلا أحداث مشوقة، بس يبقى سؤال مهم: ماهر جاب الجاروف ده منين؟؟
عالم جديد ومسحة أسطورية
مرواح ورد وماهر عند عزة هيفتح عالم جديد ومثير، كمان أراهن أن هيبقى فيه تمثيل حلو مع الكثير من الشقلبظات.. فخلوا عينكم على شخصية “وليد”، الشاب الذي هو علي صبحي ممثل حلو ومعجون مهارات.. بيمثل ويغني ويرقص وكلاون وبيمشي بالمارد “الرجلين الخشب العالية” ويلعب في السيرك ولن أندهش يومًأ إذا أدعى أحدهم إنه شافه بيطير في الجو أو بيطرطر رابسو.
مكالمة ورد مع حياة -من كام حلقة- أتكلموا فيها عن رؤية شافتها حياة بخصوص ورد، والحلقة دي سرحت بشكل ملحوظ وجوزها خد الموضوع بشكل جد.. وهوب الباب خبط، حتى وقت رجوع الواد.. كان فاضل بس تقول “إِنِّي لَأَجِدُ رِيحَ آدَمَ”، فتقريبا كده هنعيش مسحة أسطورية بخصوص حياة، مش عارف هتطلع مندوهة ولا راضعة على زرقاء اليمامة.. المهم إنها بتحس بما هو آت.
التشخيص له ناسه
سما إبراهيم قافشة شخصية حياة حلو أوي وبتلعبها بصدق شديد وبلا أي حزق أو افتعال، سرحانها اللي أتكلمت عنه وخضتها لما سليمان جوزها حط أيده على كتفها، ورعبها وشعبطتها فيه أول ما الباب خبط.
التصعيد من طرف رجالة وجيه بخطف ابن أخت ورد “آدم” عقد الحدوتة أكتر وحط مصير شخصيات تانية ع المحك، كمان المشهد القصير الثابت ده فيه أمتاع تمثيلي عالي من الثلاثي سما إبراهيم، سامي مغاوري، هاني المتناوي، 3 مشخصاتية تقال لعبوا مشهد مهم زي ده بعيونهم بس.
كمان محمود الليثي عامل شخصية “سعيد” زي الكتاب ما بيقول، أداء بسيط وسهل خالي الآفورة.
أهم الأحداث في المشوار
وصول ماهر لمكتب راشد المحامي هينقل اللعب لمستوى تاني، كمان أن المقابلة تتم عن طريق بلدياته كامل عبد الواحد غالبًا مش هتبقى تفصيلة عابرة.. لأن اللي لعب شخصيته محمد عبده، وعبده ده واحد من نجوم فريق بلاك تيما، فمش هيعدي يعمل مشهدين، خصوصًا إن نظرات كامل لماهر وهو ماشي فيها شك.. وعبده أساسًا ممثل شاطر من قبل ما يغني فمش هيبقى بيبص بالطريقة دي بلا هدف.
تأكد راشد من كدب وجيه عليه وإجباره على كشف ورقه.
أما أخطر حاجة حصلت هي أن ماهر اتصل على سليمان من شريحة سعيد.. وأن المقدم علاء خد الرقم.
ويساويه في الخطورة ويمكن أكتر، لو كانت ورد ورحيم ظهروا في الفيديو ده.. والفيديو اترفع ع اليوتيوب.
أخطاء وتفاصيل غامضة
لأن الحلو مايكملش -خصوصًا لما يكون مضغوط- حصلت شوية غلطات، كمان فيه تفاصيل غامضة صعب نحدد دلوقتي هي غلطة ولا تفصيلة مقصودة هيتبني عليها حاجة تاني قدام.
- بناء على إيه صاحب المقلة أستأمن ماهر لدرجة إنه يديله الموبايل يتكلم ويتمشى ويخرج بره المحل.
- ماهر جاب رقم سعيد الجديد منين؟.. التفصيلة دي غامضة يا تتكشق لنا بعدين يا تبقى غلطة.
- ماهر اقترح مكان المقابلة وهناك أتكلم كأن سعيد هو صاحب الاقتراح.
- سليمان جاب رقم ماهر الجديد منين عشان يبعت له ع الواتس؟
ده غير السؤال اللي في الأول.. ماهر جاب منين الجروف؟، أدينا مكملين فرجة وهنشوف إيه الأسئلة اللي هتظهر لها إجابات وإيه اللي هتنضم لقائمة الأخطاء.
الكاتب
ما هو انطباعك؟
