سيد وأبو الأنوار .. حوار مش زي أي حوار

بمجرد ذكر اسم ” أبو الأنوار ” ستأتي صورته أمام عينك، لا يشبه أحد بنظارته التي يرتديها دائمًا. ستتذكره فورًا بموسيقی تراك “باشا اعتمد” الذي تعاون فيه مع “أبيوسف”.

“محمد علي نور” أو “أ بو الأنوار ” مغني راب مصري ظهر علی ساحة الراب في مصر بأسلوب مميز وتراكات خاصة به أحدثها كان “خلصانة” الذي تعاون فيه مع “ليل بابا” كمنتج للتراك.

“صدقني بنتسحل و نمل من التعب

عنينا بتتقفل بنقوم و نشتغل

مجتش من ساعة دي جت بعد زمن

مجتش ببلاش منمناش ده كان تمن”

• كلمات من تراك “مش ناقص” لأبو الأنوار

أبو الأنوار في فترة قصيرة حقق نجاحات عديدة وبرز اسمه ضمن ألمع نجوم الراب في مصر.

سألت أبو الأنوار عدة أسئلة للتعرف أكتر عليه.

1- ليه بتقدم راب ؟ الراب ايه بالنسبة لأبو الانوار يعني؟

– بقدم راب علشان هو أكتر فن بتقدر تعبر فيه عن نفسك كفنان، أنت بتفكر مع حد أزاي تصنعوا المزيكا. بتكتب الكلام بنفسك وبتلاقي الطريقة اللي بتقول بيها الكلام بنفسك وبتختار المزيكا بنفسك، فهو فن معبر أوي عن كل حاجة فيك.

أي لحن بنطلعه هو عصارة ألحان ومزيكا أنت سمعتها زمان واتخزنت في اللاوعي بتاعك وبتنعكس علی كلامك وألحانك، فهو بيعبر عنك أوي في أي أغنية ليك، فده بالنسبة لسؤال ليه اخترت الراب.

2- شايف المنافسة ازاي في مجال الراب في مصر والوطن العربي؟

– أنا في مصر عامةً أصغر الموجودين علی الساحة، مش ناس كتير تعرف أن عندي 21 سنة فاللعبة لسة طويلة ومش بفكر في المنافسة دلوقتي، دلوقتي بفكر أعمل أغاني حلوة، أغاني تعلق مع الناس وبس، المنافسة بقی احنا الحمدلله موجودين، بنجتهد أوي وبنعمل اللي علينا وفارقين عن ناس فنيًا، منافسة الأرقام دي بتاعت وقت وبتاعت ربنا، أنا عمري ما فكرت في أرقام من ساعة ما بدأت وكل مرة أي أغنية تضرب مكنتش بفكر في أرقام قبلها وربنا بيكرم وبيكافئ.

بالنسبة للوطن العربي فـ إحنا كرابرز مصريين من سنتين أو تلاتة أو من قبل كدة كمان بس أشطة تمام يعني من 2020 و 2021 أنا شايف أن الراب المصري هيكون في قمة الراب العربي لأن احنا مختلفين ومسموعين جدًا وبنعمل راب الأغنية كاملة عربي، قليل جدًا أن حد عندنا يحط كلمة انجليزي أو حاجة فده أكتر راب عربي عربي، وفي نفس الوقت في Hits، يعني في السعودية وفي دول الشرق الأوسط كلها متمسكين باللغة العربية بس ده بيجي علی حساب صياعة التراك، عكس دول شمال أفريقيا اللي بيتنازلوا عن اللكنة وبيتكلموا فرنساوي في نص الكلام عشان يطلعوا ألحان أو أغاني فبيتنازلوا عن العربي، ف احنا أكتر ناس عاملة Balance -توازن- في الاتنين وبنحاول نخلي الموضوع عربي مصري أوي وفي نفس الوقت حاجة ظريفة وينفع تشتغل كـ Bob music، احنا بدأنا في مصر نخش تحت طائلة الـ Bob music.

“محمد علي نور” أبو الأنوار الذي تم عرض تراك خاص به في أحدی حلقات المسلسل الأمريكي “Ramy” والذي أحدث ضجة كبيرة جدًا في مجال الراب في مصر يجيب عن سؤالي حول قوة انتشاره ووصوله للعالمية.

إقرأ أيضا

الخوف من المصير المجهول.. قصص فلسطينية لـ”الميزان” تهز القلوب جراء العدوان الإسرائيلي

3- عرض تراك ليك في مسلسل أجنبي، أبو الأنوار يقدر يوصل بالراب أنه يكون منتشر بالشكل ده، شايف ده نجاح فردي ولا حاجة تُحسب للراب المصري ككل؟

– هو أكيد نجاح لينا كلنا مش نجاح ليا لوحدي، أن الراب في مصر يسمّع جدًا لدرجة أنه يشتغل في مسلسل برا فهما شافوا مين من الرابرز مزيكته تليق أنها تشتغل برا وفي Club فيجيبوا أغنيتي أنا، بس اللي دفعهم يسمعوا راب عربي أكيد زمايلي “أبيوسف” و “بابلو” والناس اللي قبلي اللي بدأو الـ Wave من أول 2016 و 2017 ده اللي وصل أنهم يطلبوا راب مصري وأن ده يشتغل في مسلسل ف ده نجاح فردي أن أنا عملت نوع يليق يشتغل برا والأجانب يسمعوه لكن أنها تشتغل في مسلسل عالمي ف ده نجاح جماعي لينا كلنا.

أبو الأنوار الذي يعد تراك “باشا أعتمد” أحد أبرز نجاحاته والذي شهد انطلاقة حقيقية له مع “أبيوسف” وساهم في عدة تراكات أخری جمعت بينهم أبرزها “الكريسماسيتو، El puerto، المويرتو، طالعين، فيينا” يجيب عن سؤالي حول إذا كان ممكنًا ظهور تعاون بينهم في أعمال قادمة.

– يوسف أخويا الكبير، أنا يعتبر سمعت راب مصري بسبب أبيوسف من وأنا عندي 12 أو 13 سنة، كنت بسمع راب مصري بس هو من الناس اللي حببتني في الراب المصري وعلقني بيه، وبعدين بعد ما عرفته هو من أكتر الناس اللي علمتني أعمل أغنية حلوة ازاي، أنا كنت بعرف اعمل أغنية وبعرف اكتب بس هو علمني اعرف أعمل أغنية كويسة وحلوة، وفي الحياة بقی عمومًا برا عن المزيكا لأن أنا علاقتي بيه المزيكا دي حاجة بسيطة أوي فيها لأن احنا بقينا خلاص عيلة واحدة أنا و “أبيو” و “ليل بابا” و “حسن خورشيد” و “ديسو” فالمزيكا دي حاجة صغيرة ومش بنفكر بقی في المخططات اللي بينا، احنا بنبقی قاعدين ونخلص أنا وهو تراك، هو و “ديسو” تراك، هو و “ليل بابا” تراك، ف مش بنفكر فيها وأكيد في حاجات جاية جديدة.

أبو الأنوار من مواليد 26/3/1999، يصل عدد المشتركين علی قناته علی “يوتيوب” لأكثر من 269 ألف مشترك بينما أكثر تراكاته مشاهدة هو “سكو سكو” الذي تخطی حاجز الـ 5 مليون مشاهدة.

يرتاح نور في ارتداء النظارات، يكتب ويبدع و -يراب- ببساطة وسهولة، أبو الأنوار الذي سيصل لأبعد مدی بعد فترة قصيرة جدًا لأنه مجتهد ويحترم ما يقدمه.