675 مشاهدة
اللي سابته الهانم.. تاخده مساحة السلالم!
انتهت العلاقة خلاص وحبيبك ارتبط بواحدة تانية؟
يلا نبدأ التلقيح بقى وبدايتها طبعا لابد أن تكون جملة الفتاة المصرية الأصيله “اللي سابته الهانم تاخده مساحة السلالم “هنا بقى يسعدنى ويشرفنى آنساتى سيداتى سادتى أنى أفجأك و أقولك أنت ما فكرتيش ثانيه واحده قبل ما تكتبى الجملة دى يا هانم ! أحب أقولك أنك كنت مساحة سلالم فى وقت من الأوقات (هتطلع واحدة تقول لا أنا أول حب في حياته) هقولك لا كان فى حب أول بس هو مقالش تدرى ليش؟ لأنه محبش يضايقك أو ينكد على نفسه أو فاكر أنه هيأخد جايزة لما يفهمك أنك أول حد في حياته و أهو مبرر لأفعاله غير المنطقيه بي أن دى أول علاقة حب ليه و مش عارف يتعامل
.أغلب الرجالة ليهم حب في فترة المراهقة على الأقل (لو ملهوش يبقى عنده مشكلة خدى بالك) نقطة و من الأول السطر و ركزى بقى عشان نقضي على المقولة دى والنبى
حاليا الأنسان اللى بتحبيه عشان يوصل للمرحلة دى معاكي من النضج و التفهم و الأهتمام فأكيد هو مر بتجارب مع الهانم اللى قبلك أتعلم منها عشان يتعامل معاكى يا (هانم برضه) مش هقول عليكى مساحة سلالم لأ
يعنى نبص شويه للجانب الإيجابى في الموضوع الانسانة اللى كان مرتبط بيها قبل ما يعرفك كان ليها تأثير عليه وعلى تعامله مع الجنس الناعم من بعدها لولا خناقتها و مشاداتها معاه مكنش أخد باله من حاجات صغيرة كتير بتعجبك أنت حاليا طب نسأل نفسنا هو عرف الحاجات دى منين ؟ أكيد هو معملش دراسات عليا فى فسيولوجية المرأة صحصحى شوية كدا ضيفي على كل دا أنه مكنش هيحرص على أنه ميكررش أخطائه عشان ما تعمليش زيها و تطفشي من وشه
الرزانه اللى بتشوفيها منه أغلب الوقت مثلا مش دبلوماسيه منه لا نهائي دا بس عشان في واحدة قبلك كانت قايمه بدورها كما يجب أن يكون و شايفه شغلها على أكمل وجه فأتعلم أنه يمسك أعصابه عشان ما يدخلش فيها السجن
نحط بجانب مقولة “اللى سابته الهانم تاخده مساحة السلالم ” مقولة “اللى سابته القرعه تاخده أم الشعور” يعني أنت مين دلوقتى؟ ما أنت لو قصده تهيني نفسك مش هتقولى على نفسك قرعه عشان لأضعف الأيمان هتقولك طيب ماشى يا قرعه!! فأتمنى يا عزيزاتى تركزوا قبل ما تطلقوا المقولات و الأمثال الركيكه على بعض عشان فالأخر أحنا مخدناش من الرجاله غير حلاقة الدقن كما قالت الخاله نوسة و أخيرا كلنا هوانم و حلويين و مسرحيين شعرنا و نتمنى لكم علاقات هادئة خاليه من الردح فى فصل تالته تالت دا
الكاتب
ما هو انطباعك؟
