هو المغني محمد فؤاد هيرجع إمتى ؟

الحقيقة مش عارف ليه المغني محمد فؤاد دايمًا عايش في الماضي، من كام يوم ظهر في برنامج وقعد يتكلم إزاي أنه صنع محمد هنيدي وإزاي غير السينما ؟ وإزاي هو ابن بلد ؟

محمد فؤاد كان مطربي المفضل أيام المراهقة بجوار محمد منير، وكنت دايمًا واقف جنب محمد فؤاد ضد محاولات عمرو دياب، ليه ؟ لأني شايف أن محمد فؤاد زينا .. شبهي .. بحس أن عمرو دياب على طول على عينه على بره و مزيكا بره.

كنت بشتري بوستر المغني محمد فؤاد قبل ما أشتري ألبوم عمرو دياب ، أيام ما كان البوستر له سعر، محمد فؤاد كان مطرب قادر على المنافسة والصمود أمام ذكاء عمرو دياب

محمد فؤاد كان ناجح وسط الناس بأغانيه وأفلامه، وكان مقبول في التمثيل، ومحدش يقدر ينكر موهبة ونجاح أفلام محمد فؤاد كنت بحب له أغلب أفلامه أمريكا شيكا بيكا، وإشارة مرور وغيرها من أفلام ناجحة، غير أنه كان بيعرف يعمل كليبات تمثيلية، وكانت كليبات محمد فؤاد ناجحة جدًا.

نرجع بقا للقصة الشهيرة بين محمد فؤاد وهنيدي حول مين سبب النجاح ؟ فيلم اسماعيلية رايح جاي فيلم ضعيف جدًا، وغير منطقي، والكتابة سيئة وكان نازل قدام المصير وتفوق على المصير لأن الناس كانت متعطشة لظهور نجم كوميدي جديد محمد هنيدي.

محمد هنيدي فى أقل من سنة كان عامل فيلم صعيدي في الجامعة الامريكية وحقق نجاح خرافي فى تاريخ السينما المصرية وقتها.

إقرأ أيضا

العرائس ليست مجرد دمى فقط

رسالتي لمحمد فؤاد مش مطلوب منك تكلم عن الماضي، المطلوب منك ترجع لنفسك وفنك و تحاول تقدم أغاني حلوة زي زمان، إعمل زي عمرو دياب، إنت في النهاية مغني بيمثل مش ممثل بيغني.