تجربتي مع السيناريو من الفن إلى الهلس

مش عارف العمر جري إزاي بسرعة كدا، فجأة لقيت نفسي داخل في أزمة منتصف العمر، وأحلامي في السيناريو محصليش منها حاجة.
أنا محبط جدًا وحزين جدًا.

أول مسلسل عملته “عائلة بسطويسي ” بعد لما أتصور اتذاع منه حلقة ووقف عرضه  بسبب مشاكل إنتاجية.
كنت وقتها حاسس إني قربت من حلمي، أول مسلسل كان هينزل ليا، قولت بعدها مش هلاحق على الشغل، فجأة المسلسل وقف والأحلام انهارت.

مفيش حاجة حصلت، كان وقتها بابا الله يرحمه فاكر إني هبدأ أنجح في الكتابة، فجأة سراب
شوية نصائح من أحاديث الكاتب الكبير أسامة أنور عكاشة.

أنا نجحت بعد الأربعين
الفرصة قبل سن الأربعين كانت منعدمة
وصلت لمرحلة صعبة جدًا
لازم تفتكر أن نجيب محفوظ  نشر أول رواية بعد سن الأربعين
طيب أنا بعرف أكتب ولا لا ؟
يعني أنا موهوب ولا موهوم؟

مش مهم .. حتى لو كنت مش موهوب أنا اجتهدت وعملت نفسي وذاكرت كتير أوي السنين اللي فاتت أنا بقيت شاطر ومختلف ومتميز.
ليا شوية أصدقاء وشوية  تجارب ناجحة في عالم الكتابة بتدل أني ممكن أكون مميز
عندي أخطاء في الكتابة ومشاكل حاولت أصلحها؟.

كنت حابب أحضر ورشة سيناريو ؟
حضرت الورشة عشان أعرف أنا مالي؟
هنجح طيب؟
أنا كويس ؟

أيوة يا محمد أنت كويس ..انت بتختار موضوعات بعيدة عن السوق ..أنت مهتم بالتاريخ أكثر من اللازم والناس كلها مهتمة بموضوعات تانية ؟
طيب حاول تكتب أعمال معبرة عن السوق..
أنا بكتب أعمال بتعبر عن السوق بس عارف أسوق لنفسي
كمان مش هبقى مبسوط يعني أني أعمل أعمال لا تعبر عني
المهم احنا لسه بنحاول ..أكيد في يوم أعمالي  من الأعمال المؤثرة في حياة الناس
أنا مش حابب أكتب وخلاص
أنا حابب أعمل شغل حلو ..شغل أنا أحبه والناس تحبه

طيب سؤال ممكن حد يعرفه انت نجحت في ايه ؟
عملت كام مسلسل راديو كانوا كويسين وعملت كام مسرحية كان عليها إقبال
فأكيد يعني لو عملت مسلسل الناس بتحبه..
أنا معايا كمية تجارب فاشلة في عالم السيناريو ينفع كتاب لوحدها
بس ممكن نتكلم من أقرب حدث ..

إقرأ أيضا

يا مهلبية يا .. ماهر عواد

أنا بكتب مسرح وليا اكتر من مسرحية اتعملت فعلا..أعتقد أني بعرف أكتب مسرح كوميدي..المهم ليا مسرحية روحت قدمتها لممثل بطل مسرحي بس كوميدية مش شبهي
كوميدية شبه كوميدية أغاني المهرجانات المهم بعد كام يوم قال لي إنه مش فاهم النص
النص كان أبسط من بساطة وبيحكي قصة بسيطة جدًا.

بس فيه نجوم زي ما فهمت بتخاف من الكوميديا بتاعتي إنهم يقدموا حاجة ممكن تحمل فكرة..
هما عاوزين هلس
الهلس فقط
أنا هحاول الفترة الجاية بدل ما أموت من الاكتئاب أني أكتب لهم أعمال شديدة تافهة شديدة الهلس يمكن أعرف أحقق حلمي ..لأني حاسس إن حلمي وحياتي بتضيع كل يوم .