135 مشاهدة
يا مهلبية يا .. ماهر عواد
الحقيقة أنا بحب جدًا فيلم سمع هس لماهر عواد وشريف عرفة، يعني بعتبره من الأفلام المفضلة بالنسبة ليا، فيلم جميل أوي وممدوح عبد العليم عامل دور عمره وقتها، ممثل لم يستغل فى السينما كما يجب، ممثل جميل و كمان ليلى علوي، بحب شريف عرفة مع ماهر عواد جدًا، بحس إن شريف بيكون براحته، بحس أن خياله جامح مش مقيد.
تعالوا نقول أن كل أفلام ماهر عواد بتحكي عن الحلم والأمل و الحاجات اللي زي كدا، وكلها فشلت في السينما، يعني لو تفتكر معايا فيلم رشة جريئة على سبيل المثال وليس الحصر كان بيحكي عن البطل اللى بيحلم بالسينما سلامات يا سيما، فيلم سمع هس كان حلاوة بيحلم أنه يقدم فنه للناس، سلامات يا فن، مفيش حد بينجح فى أفلام ماهر عواد.
ماهر عواد مع أنه مش معروف للناس العامة ولا عمر أفلامه نجحت مع جمهور السينما، بس هو مؤلف مهم في تاريخنا المعاصر وأفلامه دائما بتنجح فى العرض التلفزيوني جدًا زي نجاح صاحب صاحبه فى التلفزيون ونجاح رشة جريئة و سمع هس وغيرها من أفلامه فى التلفزيون.
ماهر عواد عمره ما عمل حوار تلفزيوني ولا حضر ندوة ولا أتصور فى جرنال، حواراته الصحفية قليلة جدًا ودايما بيهرب من أي حوار عشان مش عاوز حد يسأله ولا حابب يتكلم عن قصة حياته ولا قصة زواجه بسعاد حسني لأنه آخر أزواجها.
أعتقد أن ماهر عواد حب سعاد حسني، وأعتقد أنه من الناس القليلة المحترمة في حياتها اللى عمره ما حاول يستغلها ولا يستغل زواجه في الترويج لنفسه ولا حياته، ماهر عواد راجل محترم.
نرجع للعنوان بقي من شوية قررت أشوف فيلم يا مهلبية يا لماهر عواد وشريف عرفة، الحقيقة كانت ذكرياتي عن فيلم يا مهلية يا مختلطة، بس حبيت إن أقوم بإعادة مشاهدة للفيلم، الفيلم جميل أوي، مدهش، سابق عصره، صوره حلوة و كوميدية جميلة و قضية مهمة تستحق المشاهدة، أعتقد غياب كاتب بحلاوة ماهر عواد خسارة لينا احنا كمشاهدين.
الكاتب
ما هو انطباعك؟
