في اليابان .. مطعم يتحدى زبائنه بطبق عملاق يدفع لهم ٤٣٨ دولار من أجل تناوله في ٢٠ دقيقة

الواحد مننا وهو جعان بيتهيأله إنه ممكن يفوت في الحيطة، وساعات فعلاً بيفوت، أنا في شبابي أكلت عربية كبدة في ساعتين وصاحبها روح بعد ما قضيت وهو بيدعيلي والحمد لله دعوته دي نفعتني كتير قي في المستشفى وأنا بعمل غسيل معدة بعدها، بس امبارح قريت خبر عن مطعم في طوكيو حيث كوكب اليابان اللي بيغيظنا ده بيقول إن في مطعم اسمه “أوماكارا” عامل عرض إنه يدفع ٤٣٨ دولار للي يقدر ياكل طبق “رامين” عملاق في تلت ساعة.

طبيعي أول حاجة عملتها شفت الدولار وصل كام، قبل الأكل وبعده، تاني حاجة رحت أدور ياخويا إيه الرامين ده لا يكون صراصير ولا ضفادع، طلع ايه يامولانا، مكرونة على فاصوليا على نوع من العجين على فراخ مع شوية بهارات فيها الفلفل زيادة، الحقيقة مطلعتش المكونات تخض كمان صورته طلعت لذيذة

المدهش في الخبر إن ٩ بس اللي قدروا ينفذوا التحدي ده، وأغلبهم قال إنه مقدرش ياكل لمدة اسبوع بعدها، اليابانيين دول عندهم طرواة يا أخي مش ناشفين كده، ده حتى المطعم من لطافة أصحابه كبر العرض وقال طيب لو أكلتوها في نص ساعة حنديموا ٢٣٦ دولار.

اقرأ أيضا

صُناع مسلسل حي الجمالية : لم نشوه تاريخ مصر ونحن ملتزمون بشروط ” المجد” ( حوار )

عامة أنا بقولهم يحسبوها كويس علشان لو اتاكلت في ١٠ دقايق أصل الناس دي متعرفناش ،متعرفش جبروت المصريين يا أهل اليابان  ، ييجي ايه الرامين ده جنب فتة الكوارع والطواجن والمحاشي والحبس بأم علي.

إقرأ أيضا

مقتل السنوار وأزمتنا مع الكلام

جايلك ياطوكيو