تقرأ الآن
خط دم .. ليس فيلم رعب بل هو كوميدي من الدرجة الرابعة..لماذا؟

رئيس مجلس الادارة: رشا الشامي
رئيس التحرير: أسامة الشاذلي

همتك معانا نعدل الكفة
500   مشاهدة  

خط دم .. ليس فيلم رعب بل هو كوميدي من الدرجة الرابعة..لماذا؟


يبدأ فيلم خط دم بمشهد لـ الاستاذ ظافر العابدين، يخطو داخل صالة فيلا تعبر عن الثراء آخر 3 حاجات، وتقابله الأستاذة نيللي كريم بلهفة سائلة “جبت الدم؟!”، بدون أي سياق واضح سيبنا الجمهور كله يخمن إن الأستاذ ظافر مصاص دماء والأستاذة نيللي بشرية، طيب توضح يا جماعة، طيب ادونا خلفية عن كيفية نشأة العلاقة دي وإزاي نيللي كريم قعدت تسمع اعتراف ظافر العابدين إنه مصاص دماء وبعدين شهقتةخبطت على صدرها مثلا زي أي ست مصرية أصيلة، وبعدين قالت والنبي هو حنين إياكش هو بيحب الأكل ني!، وأهو ميزة برضه توفير.

 

لاء كل اللي فات ده من وحي خيالي المريض، الكاتب اكتفى بمعلومة إن نيللي اتجوزت ظافر وهو مصاص دماء.

 

الحبكة:

حبكة الفيلم إن ابنهم بقاله 18 شهر في غيبوبة بعد حادثة حصلت له، والحاجت الوحيدة اللي قدامهم دلوقتي هما إنهم يحولوه لمصاص دماء عشان يرجع يعيش تاني وإلي الأبد، طيب إية الحادثة؟!، لاء مش مهم نعرف وانت جمهور عادي يعني ما تركزش كفاية تتفرج على أنياب أستاذ ظافر عشان تتخض!، مع إن الإبن لما بيفوق وفي صدام بينه وبين أبوه مصاص الدماء قاله أنا فاكر الحادثة كويس، وفي اللقطة دي أبوه سابه!، ده معناه إن الحادثة ليها تأثير على الأحداث بس لاء محدش حاول يقولنا حاجة هو كده، وبيقوم الأخ اللي بقى مصاص بتحويل الأخ اللي ما بقاش مصاص عشان يفضلوا يلعبوا مع بعض بقية حياتهم.

 

شوية حاجات كده على جنب:

 

الأستاذة نيللي أول ما اتحول ابنها جوزها ظافر عابدين بيقولها لازم نروي عطشه هاتيله فار، الحقيقة هي قرفت أوي أوي أوي، وقالت له أنا ابني مش حياكل فار، وراحت جابت له قطة الجيران ياكلها!.

 

إقرأ أيضًا…لعنة أم خجل أم كليبتومانيا..لماذا يسرق الفنان أحمد مالك؟

 

كلب الجيران قرر فجأة يهوهو على بيت نيللي وظافر، على أساس إن الولد اتحول مصاص دماء وكده، طيب هو مش البيت ده من الأول فيه ظافر مصاص دماء؟!.. الكلب كان ساكت ليه يعني عن وجود ظافر العابدين كمصاص دماء وقفش على الولد؟، ولا هو مصاص الدماء اللي نعرفه أحسن من اللي ما نعرفوش؟.

 

الأستاذ ظافر بعد ما جارتهم بتنبش في جنينته وبتلاقي القط الميت والأرانب، بدل ما يخرج زي أي مصري أصيل ويقولها امشي يا ولية من هنا، أو يجيب كلب ويعتبره مبرر مثلا لكل الحيوانات النافقة دي، قرر يقتل جارته يا مؤمن عشان يغطي على موت القطة، وهنا أحب أوجه معلومة صغيرة للاستاذ رامي ياسين، لو كانت الست دي بلغت البوليس عن جثة 35798 قطة و340397 أرنب ولا كان حيتحرك ولا كان حييجي ناحية ظافر العابدين من الأساس، قتل الجارة هنا تصعيد درامي ملهوش أي سبب.

 

إقرأ أيضا

إقرأ أيضًا…عندما صرخت سميرة صدقي بعد تحرش محيي إسماعيل بها في مشهد ساخن

 

آخر حاجة بقى ومشهد الفينالة على الناحيتين، الاستاذ ظافر دخل عليه البيت 3 ظباط عشان يقبضوا عليه، تمام جدا لحد كده؟، طيب الاستاذ ظافر لأنه مصاص دماء وطبعا قوة خارقة وبيتحرك بسرعة الضوء قتل 2 منهم وبعدين ساب التالت وطلع فوق الروف عشان الشمس تحرقه، طيب ما كان قتل التالت وحصل عياله وامهم ع المزرعة، وكان حيصرف أموره يعني، هو ما شافش توايلايت؟.

 

آخر مشهد وده الحقيقة أنا ما فهمتوش عشان أعلق عليه أصلا، فحنقوله زي ما هو كده.. نيللي كريم بتخرج تجيب أكل لولادها، ما بتتحركش من قدام المزرعة، بترجع وبتقرر إنها تكون هي وجبتهم!!.

بس كده.. بس كده فعلا! .. اتفرج على الفيلم لو حابب تضحك واعتبر نفسك بتتفرج على حاجة زي سلسلة Scary Movie.

الكاتب

Content Protection by DMCA.com

ما هو انطباعك؟
أحببته
1
أحزنني
0
أعجبني
0
أغضبني
0
هاهاها
1
واااو
0
Slide
Slide
Slide
Slide
Slide


2 تعليقان

أكتب تعليقك

Your email address will not be published.

حقوق الملكية والتشغيل © 2022   كافه الحقوق محفوظة
موقع إلكتروني متخصص .. يلقي حجرا في مياه راكدة

error: © غير مسموح , حقوق النشر محفوظة لـ الميزان