108 مشاهدة
أسامة الشاذلي .. ياللي السما مسبحة له ولا تنتهي معجزاته
أنا عارف طبعا إنك شايفني وعينك عليا وعلى كل حبايبك كعادتك يعني دي مش حاجة غريبة عليك، بس إن جيت للحق استعجلت إنت أوي يا صاحبي وأنا عارف إنه مش بإيدك صدقني ومقدر؛ بس هقولك إيه بقى ما أنا طول عمري سبب صداعك، يعني إيه الجديد ؟!
أنا واثق إنك أكيد ف المكان اللي كنت طول عمرك بتحلم بيه وإنت لما طلبت مرة وقلت “لما أمشي عاوز عمرو وعطية وكيرو يكتبوا عني” إن جيت للحق أنا ماقدرش اتأخر عنك ولا عمرو وعطية كمان، بس قلم عمرو مكسور دلوقتي مش قادر يكتب حاجة، بس ماتقلقش انا أضمنهولك برقبتي، وعطية طول عمره جدع وابن حلال مايتأخرش عنك أبدًا.
احنا مانتأخرش عنك يا صاحبي أبدًا انت مافارقتش حد فينا، طب أقولك حاجة ورحمة أبويا اللي كنت بتصدقني على طول لما أحلف برحمته أنا حضنت “علي” ابنك كأني عاوز أطلعك من جواه، وبمناسبة علي صحيح انت جايب للدنيا سيد الرجالة ومابعدش عني لحظة وكان واقف جنبي طول الوقت وبصيتله وأنا الدموع مغرقة صوتي وقلبي وقلتله “راجل يا علي” رغم صغر سنة وأحب أطمنك إننا هنبقى أصحاب جدًا.
عمرو تعبان أوي يا أسامة ومكسور أوي بسبب إنك مشيت أنا ماكنتش عارف إنه بيحبك للدرجة دي بس إنت عارف عمرو قدها وقدود يعني ومحمد الموجي كان واقف جنبي طول الوقت ولسانه ما بينطقش غير كلمة واحدة كان بيقولها رجل بيستنجد بالله من بطن الحوت وقعد يردد “اللهم لا إله إلا أنت سبحانك إني كنت من الظالمين”.
أصل انت بالنسبة لمعظم الموجودين حاجة وبالنسبة لنا احنا كنت حاجة تانية خالص.
إنت يا جدع كنت جايب روحك دي منين، ف قلبك تقل الجبل ورقة العصافير على رأي فؤاد حداد انا شفت ناس جاية تودعك والله تشكيلة ما يقدر يعملها غير أسامة الشاذلي.
طب أقولك على حاجة والله العظيم فيهم ناس أنا واثق إن عمرها ما شافتك ف حياتها.
فهمي بيسلم عليك أوي يا أسامة ونفسه يقعد معاك أوي فلو تعرف تزوره ف منامه ف يوم يبقى كتر ألف خيرك عشان هو مش قادر لسه يفهم ويستوعب اللي حصل مانت عارف فهمي رقيق و أخضر زي الأرض اللي مابتبطلش تطرح خير أشكال وألوان.
فاكر يا أسامة لما كنت بتقولي أنا عاوز أصالح كل اللي زعلانين مني وأراضيهم أنا اللي بقولك دلوقتي بقى أرجوك سامحهم انت وماتجعلش منهم حد خصيمك ف اليوم العظيم.
إنت عارف إن أخوك جبل ويسند بلد بس أقولك على حاجة بكيت زي العيل اللي تاه من أبوه وأمه ف ليلة غبراء مع إني ف المواقف دي ببقى قوي جداً بس أجيبها منين القوة يا حبيبي دا كأن واحد ضربني ف نص رجلي من ورا وقعت على راسي ..هو دا احساسي بالظبط
ما ترجع يا صاحبي أقولك تعالى نضرب ستة ف ستة ب ستة وتلاتين
واحنا الاتنين بس اللي نضحك وسط اللي قاعدين عشان أنا وانت بس اللي فاهمين اللي فيها بس ماتقلقش هحكي ل علي كل حاجة اللي انت حكيتهوله واللي ماحكيتهولوش و هحكيله على قصتك مع المنتج المشهور اللي رفضت تشتغل معاه وعلى حكاياتك مع فاروق الفيشاوي ألف رحمة ونور عليه .
وهعلمه الاستميشن عشان يطلع لعيب زيك مع إني عارف انه حتة منك ومش محتاج يعرف كل دا .
طب أقولك على حاجة تعالى نرجع يوم واحد من أيام المولد لما كنت تدخل تلاقيهم كلهم شغالين وانا واقف ف البلكونة مولع سيجارة وتقولي خش اشتغل واتلم يا … وأنا أضحك وأتلم وأخش أشتغل فعلا .
بس هتيجي إزاي إنت وإنت أكيد ف أحسن حتة ف الدنيا طب أقولك خليها على الله ولما ربنا يأذن انا هاجيلك والأيام بتعدي هوا انت عارف .
الكاتب
ما هو انطباعك؟
