مفلسين : يوميات فقران جدا

أنا فقير جدا، أنا مش لاقي أكل، أنا أبيض يا ورد ..

أنا جاي أدور على أي لقمة تتاكل، أنا والعياذ بالله من كلمة أنا بيخش لي كل يوم دخل ثابت والحمد لله حاجة كده بتاعة ٢٠ جنيه، نعمة ربنا يحفظها من الزوال.

وساكن في حمام بيت قديم أنا ومراتي و أربع عيال، يووه تلاتة بس الرابع ده الواد الغتت ابن الجيران.

مطلوب مني كرب أسرة إني  أأكل وأشرب وألبس وأعلم وأعالج الجيش ده كله.. وبصراحة أنا حاولت.

لكن معرفش ليه مراتي لونها أصفر والواد الكبير ربى دقنه و دايما يهذي بكلام مش مفهوم عن يوم حساب وجنة موعودة  مع انه مدفعش حساب القهوة اللي قفشته عليها من شهرين.

الوسطاني بقى حالته تصعب على الكافر، عنده شلل كبار وده غير شلل الأطفال خالص، ده ليه تطعيم انما التاني بشدوا فيه كولة.

أما البنوتة الصغيرة بقى فلة العيلة ونوارتها لولاها في البيت  كان الواحد طق من جنابه وياريت محدش يسألني ليه.

الواد الرابع بقى .. يييه لا ده ابن الجيران.

بس المشكلة الكبيرة اللي عندي إني بحاول أفهم، علشان فقري ده ميبقاش فقر مخ، كفاية عليا فقر الدم. وعرفت من الواد سيحا اللي واقف على عربية الكبدة اللي قصاد القهوة اللي بلمع فيها الجزم اني معدوم الدخل لا وإيه كمان تحت خط الفقر.

ساعتها افتكرته بيضحك عليا لأني فاهم وعارف إن الملعب مفيهوش غير خط النص وخط التمنتاشر، انا  برضو حريف في السنترة.

إنما خط الفقر ده يطلع إيه؟

سألت الأستاذ حامد وكيل المحامي اللي بيقعد على نفس القهوة  قالي إن اللي تحت خط الفقر دول الناس اللي بياخدوا أقل من  أربعين جنيه يوميا.

ولما سيبته ومشيت أروح بيتي، لقيت حل لكل مشاكلي

شغلت نافوخي بعوقبين كيلوباترا، جابت معايا جامد، وقررت أبيع خط الفقر بتاعي، أيوة حبيعه

وساعتها اقدر ادفع حساب الواد الكبير في القهوة، وأتعشى

إقرأ أيضا

مسلسل روز وليلى .. ما كل هذا “العك”؟!

أصل أنا نفسي أتعشى

لأني أول امبارح عرفت من الواد سيحا برضو إن أكلة اسمها العشا

اقرأ أيضا

لماذا يغضبهم الخطيب؟