تقرأ الآن
الثوابت الوهمية.. (الجزء التالت: تحريم الرق) 07 – الرقيق.. كوينز الجنة وجزرة الجهاد

رئيس مجلس الادارة: رشا الشامي
رئيس التحرير: أسامة الشاذلي

همتك معانا نعدل الكفة
386   مشاهدة  

الثوابت الوهمية.. (الجزء التالت: تحريم الرق) 07 – الرقيق.. كوينز الجنة وجزرة الجهاد

الرق
  • شاعر عامية وقاص مصري مهتم بالشأن النوبي وتجديد الخطاب الديني

    كاتب برونزي له اكثر من 100+ مقال


زي ما نوهت في ختام الحلقة الساتة.. الحلقة دي هتكون لتفكيك أسطورة “الإسلام مهد للقضاء ع الرق”. أسطورة مش بس التاريخ ما أنصفهاش.. باستمرار الرق على مدار أكتر من ألف سنة من حكم الإسلام، إنما كمان ع المستوى النظري الفكرة دي مش منطقية أبدًا.

أسطورة الترغيب في العتق

تقول الأسطورة أن وضع “تحرير رقبة” كواحدة من الكفارات في أكتر من موضع.. زي:

القتل الخطأ (92 – النساء)

الحنث باليمين (89 – المائدة)

مظاهرة الزوجة (3 – المجادلة)

كانت هي دي خطة الإسلام للقضاء على ظاهرة الرقيق في المستقبل، وده كلام مش سليم لا عمليًا ولا منطقيًا.

فعمليًا يستحيل الحالات المذكورة تخلص ع الرقيق إلا لو المسلمين مابيعملوش حاجة غير أنهم يقتلوا بعض بالغلط ويحلفوا كدب ويظاهروا مراتاتهم.. لأن وارد المسلمين ينقرضوا مع تحرير أخر مسترق، من ناحية تانية يستحيل جميع المسلمين يتخلصوا من العادات دي نهائيًا، خصوصًا القتل الخطأ واليمين الكدب. لما نضيف لده أن عتق الرقيق بدون سبب له ثواب (والحسنة بعشرة أمثالها)، فإحنا كده قدام تحول رهيب وخطير في وظيفة الرقيق.

الرق

كوينز الجنة

قبل الإسلام كانت فايدة الرقيق -بخلاف الوجاهة- توفير الرفاهية بتوليهم الأشغال الشاقة وتوفير الفلوس عبر تأجيرهم للغير ده طبعًا غير المتعة الجنسية في حالة الجواري.

الإسلام زود فوايدهم بإضافة تكفير الذنوب وأكتساب الحسنات، ومنطقيًا مافيش حد مؤمن هيبقى قصاده كوينز يكفر بيها عن خطاياه ومش هيكون حريص على أقتناء كميات منه. باختصار.. الإسلام حول الرقيق لحاجة تشبه عيش الغراب بالنسبة لسوبر ماريو.

دوافع التوسع.. جواري وحوريات

فيه بقى نقطة مهمة جدًا، بس محتاجة شوية تركيز، لإنها حاصل جمع التأثير غير المباشر لتشريعين غير بعض.

في مقال سابق استعرضت أنواع النكاح عند العرب قبل الإسلام، وأزاي التشريع الإسلامي تبنى نوع واحد من ضمن عشر أنواع للنكاح وحرم التسعة الباقيين، بكده بقى عندنا مجتمع رجالته متعودين على مستوى من الحرية الجنسية عالية جدًا فجأة بقوا تابعين لدين قفل عليهم كل السكك دي وساب بس الجواز وملك اليمين (الجواري).

إقرأ أيضا

في الحلقة التانية تحريم أم تحجيم شرحت أن الإسلام ضيق مصادر الرق عن طريق تحريم عدد من أسباب الأسترقاق، زي استرقاق الدين وأسترقاق المجرمين.. إلخ، بالتالي بقى السبيل الوحيد للحصول على رقيق هو الحرب. بكده المجتمع ده مأتقفل على رجالته سكة الحرية الجنسية إلا في اتجاه محدد.. رجعت خليت الاتجاه ده مالوش غير سكة واحدة، الحرب.

حالة الحرب في الإسلام واضحة وملهاش نهاية، وإحنا عايشين الدليل من جهاد مستمر لدلوقتي، الجهاد/الحرب لا يخلو من المخاطرة بوصفه مسبب رئيسي في موت الإنسان، اللي لو كان بيحارب لصالح دولة الإسلام هيضمن جنة فيها من الملذات الجنسية ما لا عين رأت. فبقى المقاتل العربي من دول داخل الحرب معاه خيارين.. الفوز ببنات بني الأصفر أو الفوز بـ72 حورية.

ختام

ينفع نتفق أن الإسلام قلل مصادر العبيد وفتح مصارف لتحريرهم إنه حسن من أوضاعهم وحقق لهم مكاسب كويسة، بس بلاش موضوع الإسلام حرم الرق ده.. عشان مش حقيقي والنقاش فيه بيفتح أبواب جانبية منفدة على مناطق شايكة.

وبكده نختم الجزء التالت من سلسلة الثوابت الوهمية.. تحريم الرق، وإلى اللقاء في الجزء الرابع.

الكاتب

  • شاعر عامية وقاص مصري مهتم بالشأن النوبي وتجديد الخطاب الديني

    كاتب برونزي له اكثر من 100+ مقال

Content Protection by DMCA.com

ما هو انطباعك؟
أحببته
4
أحزنني
0
أعجبني
4
أغضبني
1
هاهاها
0
واااو
1
Slide
Slide
Slide
Slide
Slide


2 تعليقان

أكتب تعليقك

Your email address will not be published.

حقوق الملكية والتشغيل © 2022   كافه الحقوق محفوظة
موقع إلكتروني متخصص .. يلقي حجرا في مياه راكدة

error: © غير مسموح , حقوق النشر محفوظة لـ الميزان