دونت ميكس 06 (بلد بتكره الحب)

الحب جميل للي عايش فيه
الحب جميل.. طب ليه نخبيه
في الدنيا ما فيش أبدًا أبدًا.. أحلى من الحب
وإن كان أمل العشاق القرب.. أنا أملي فحبك هو الحب
الحب كله نعيم لا في عزول بيلوم ولا فيه حبيب محروم
تقريبًا إحنا أكتر شعب في الكوكب بيغني للحب، على الأقل كده 50% من أغانينا بتتكلم عن الحب والحبايب والحبيبة والمحابيب والمحبحبين.. وكل ما له علاقة بالعواطف الملهلبة.
ما يعطي إنطباعًا إننا شعب يسبح في بحر من المشاعر الجياشة، بس في الواقع لا فيه مشاعر ولا جياشة ولا بنعرف نعوم من أساسه، بالعكس بقى.. ده إحنا ناس بنحارب الحب والحبيبة بقوة.. وعنف.. وباستهبال، حاجة كده دونت ميكس جدًا.

اقرأ أيضًا 
حلقات سلسلة دونت ميكس

أه ورحمة النعمة زمبؤلكم كده، يعني مثلًا أيام الطفولة البريئة بمجرد ما نشوف أي أتنين ماسكين أيد بعض أو “مأنجين” بعض أو بينهم أي أداء يظهر منه إنهم والعياذُ بالله حبيبة.. كان فيه هتاف شعبي شبه متفق عليه كل العيال بتردده بحماس شديد وإخلاص مبالغ فيه متعاصين بهجة مجهولة المصدر: سيب النعجة يا خروف.. سيب النعجة يا خروف.
ده بالإضافة لإمكانية رشهم بالمية أو تزقيلهم بالطوب، أو أي وسيلة من وسائل الآذى بعيد المدى بحيث تسمح للشخص المؤذي بالهرب بسرعة.

الكورنيش هو المكان اللي اتشهر في تراثنا بإنه المقر الرسمي للحبيبة، طبعا فيه كمان كورنيش المقطم وكل محافظة ليها كورنيشها، المهم أن على حِس الحبيبة أتكون سوق تجاري بيقدم بضايع بتمتاز بـ3 حاجات:
1- باستثناء الورد كلها بضايع تافهة.
2- كلها بضايع رديئة.
3- كلها غالية بشكل مبالغ فيه.. خصوصًا المشاريب.
بس رغم كده بتتباع.. بالإكراه طبعًا، لأن “الكَابِل” اللي مش هيشتري هيتم الترخيم عليه بشتى الطرق والكباري، ده غير خطر الهجمات المفاجأة من البوليس.. اللي تحسسك إنهم كابسين على أتنين في شقة مشبوهة، أعجب ما في الكبسات دي هو السؤال التاريخي: (تعرفوا بعض منين؟؟) أو (إيه علاقتكم ببعض؟؟)، تخيلوا معايا كده لو الأتنين دول ردوا: (بنحب بعض).. تفتكروا وقع الرد ده هيكون إيه ع البيه الأمين أو الباشا الظابط؟؟

مجتمعنا رافض للحب لدرجة التعامل معاه بوصفه جريمة نكراء، جزء كبير من قوة المجتمع متدلدقة في محاربة الحب، ده إحنا فاضل يبقى عندنا مكتب مكافحة الحبيبة. أي أتنين (ذكر وأنثى) يعرفوا بعض لازم يكون فيه مبرر رسمي للعلاقة دي، إحنا عندنا ناس ماتعرفش بعض بيتجوزوا عادي جدًا، والمصيبة أن ده أكتر شكل للجواز يعتبر محترم في نظر مجتمعنا اللي بيغني للحب طول الوقت.
أي أتنين بيقربوا من بعض الوسط المحيط بيهم كله بيركز معاهم، يا ناس ده إحنا مجتمع أغلبه بيرفض فكرة الصداقة العادية بين الجنسين، الصداقة اللي هي بتاعة صباح الفل.. واقعدوا بالعافية… والعواف.. والحاجات دي، ده إحنا عندنا طبقة كاملة لو أتنين أتجوزوا بعد علاقة حب..
عشان يوصفوا الحالة دي بيقولوا: كانوا ماشيين مع بعض قبل الجواز.

ختامًا.. كام أسرة مصرية ممكن الأبناء فيها يقولوا لأهل إنهم نازلين يقابلوا الشخص اللي بيحبوه؟ تعالوا سوا نفكر في إجابة للسؤال ده وإحنا بنتسلطن بصوت السِت.

إقرأ أيضا

مسلسل الحشاشين.. ليه نجح تنفيذيًا وفشل فنيًا؟