كواليس انسحاب نجوم مدرسة المشاغبين أثناء عرضها

الصورة هنا بنلاحظ فريق نجوم مدرسة المشاغبين بس من غير أحمد زكي، من خلال الصورة هتعرف أن محمود الجندي قدر يكمل دور أحمد زكي بعد انسحابه من العمل.

المسرحية لما طولت في العرض بسبب نجاحها التاريخي، كان أحمد زكي بدأ ينجح فى السينما وأحمد زكي كان شايف أن دوره صغير في مدرسة المشاغبين، ممكن يكون موجود كتير على المسرح بس عدد جمله وتأثيره قليل جدًا وده كان مضايقه، بالاضافة أنه مش قادر ينافس عادل إمام وسعيد صالح ولا حتى يونس شلبي زميله في المعهد في الكوميديا، لأن دمهم أخف منه وحضورهم على المسرح أعلى منه باعترافه الشخصي.

أحمد زكي كان عارف أنه مهما اجتهد في الكوميديا مش هينجح وسط النجوم دي، و عشان كان بيعمل دوره وبس، و خاصة إن دوره من الأدوار الكئيبة أساسًا، أحمد زكي من البداية كان عارف أنه ممثل سينمائي، وكان من البداية حابب يعمل سيرة عبد الناصر والسادات و حليم والشعراوي، كان عارف فين عناصر قوته وكان عارف امكانياته الغير محدودة فى التجسيد ممكن توصله لفين.

دور أحمد زكي  في المسرحية اشتغل عليه اتنين ممثلين صلاح السعدني ومحمود الجندي، وكان صلاح السعدني له وظيفة إدارية أساسًا في الفرقة أثناء عرض مدرسة المشاغبين وكان يحل محل أي ممثل يغيب من الشباب

شهدت برضة مدرسة المشاغبين رحيل  الفنان الكبير عبدالمنعم مدبولي بعدما كان البطل الأساسى لها قبل الفنان حسن مصطفى، وكان مدبولي وقتها نجم مسرحي وكان بيساعد الشباب، بيقولوا أنه حس بالغيرة لما الشباب بتعمل ضحك أكتر منه، بس السبب المعلن وقتها أنه مش حابب أن المسرحية تطول ومش حابب الخروج الكثير عن النص، مع أنه كان يخرج عن النص، بس كان شايف إن اللي بيحصل فى مدرسة المشاغبين أكثر من اللازم وإنه لديه التزامات أخرى و يجب أن تنتهي المسرحية في وقت معين ولا يتضاعف وقت عرضها.

يمكن عشان كده حاول يحافظ على أداء الدور فى فيلم مدرسة المشاغبين لنفس فريق العمل، بس الحقيقة الفيلم كان أقل جودة من المسرحية نظرًا لخفة دم نجوم المسرحية وعدم قبول محمد عوض في دور طالب ثانوي كان من اختيار سيء جدًا ، بالإضافة إلى أن عادل إمام دمه أخف من نور الشريف بطل الفيلم.

من نجوم مدرسة المشاغبين اللي اتغيروا برضه في المسرحية كانت الفنانة سهير البابلي بسبب طول عرض المسرحية وأنها كانت بتحس أحيانا بتجاوز على المسرح من سعيد صالح وعادل إمام  واللي كمل الدور مكانها ميمي جمال زوجة حسن مصطفى.

إقرأ أيضا

هل النجومية تورث أمراضا نفسية ما؟!

اقرأ أيضًا
مدرسة المشاغبين ليست مجرد مسرحية بل تلخيص لملهاة الحياة